بعدا ناطرة…. وشو ناطرة ؟

رنة وتر

بقلم / دعيبس بلوط

دعيبس بلوط

                           بعدا ناطرة…. وشو ناطرة ؟

خلص النهار وسربو وردات مصطبتنا ع خيمات  ورقاتن ..

عشعش الدوري بقرميد البيت وسكتو صوات اللي كنا وياهن  سهرانين ..

عتم  الليل بغيماتو وتكي الوقت ع سراج شباكنا ..

فلو اللي كانو ضحكة هالبيت هنن..

 وتخبا بزوايا الدار الضجر ..

ساعاتو وصارت عقارب الساحة اللي عالحيط ..

تكتب بتكاتا وجع الفراق..

 وتفتش عن ثانية للنسيان ..

وبعدو بلور شباكا عن يغزل قصص حب..

 وبعدا الحبقة عم بتزهر مواعيد ..

خلص النهار..

 وصقع الحكي بالقلوب ..

وصار حطب الموقدة يترغل دفا وعيون..

عيون  عم بتدمع ع مفرق الذكرى..

 وشوية خبريات نايمة بحضن الآه..

 كأنها ناسية انو قطار العمر مرق..

 او عم بيمرق وهيي بعدا بكتاب مدرستا مشغولة..

 وبعدا الوردة ناطرة يمرق هاك الشب ..

يغمزلا غمزة ويهرب ..

 بعدو مزراب البيت عم بينقط امل ..

وبعدا هيي موعودة بالفرح..

 ناسية انو  الوقت ما بيرحم ..

واللي مرق ما بيرجع..

 وانو وقت الفرح تخبا بعب الغيم ..

وسكت الوقت وبعدا ناطرة..

 وشو ناطرة ؟؟.

عن mcgd

شاهد أيضاً

نجوى كرم… وجها لوجه امام الظلم .

رنة وتر بقلم / دعيبس بلوط              نجوى كرم… وجها لوجه امام الظلم . النقد …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *